Luk 16 | GAM | STEP | Jisas kogoye una moi al embe dji, kune ge iwa kerman ta moi, une kog mogoi kerman kane noi. Wal merke moi ge yene boiye iwa ta molo kantau moika, una pende kane wo iwa kerman moi al embe dji, ni boin iwa wal mogin ge no kerdo we dji.

Luke 16

Boi iwa ta kogo ke yei ge Jisas kandja buko dji

1 Jisas kogoye una moi al embe dji, kune ge iwa kerman ta moi, une kog mogoi kerman kane noi. Wal merke moi ge yene boiye iwa ta molo kantau moika, una pende kane wo iwa kerman moi al embe dji, ni boin iwa wal mogin ge no kerdo we dji. 2 Kandja embe djimaka iwa kerman ge djika boiye woika une embe dji, una ni wal yen we djinj ge namba yei pille djinj ne? Ni na wal kantau ye mon ge ipon dje pene worben. Na kogena ye mon ge ipon yen pora djindo we dji. 3 Djika une boiye ge nomane pakna kill embe dje pi, iwa kerman na to orko wordo, na namba yeno? Na sapol ipo makimb wallkno ge, na yembena naparo. Na una moye al po ku kokane djino ge na pill ngandjill yendo. 4 Na kam koll goyo paro. Na kando, na kogo ta embe yenaka una na i yenekne numbine al ta worne dje pille moi.

5 Iwa Kerman wal dje i una ge boiye po djika kambono er woi. Womaka iwa ta moi al boi ge embe dji, ni iwa kerman wal in ge namba namba in ne? dji. 6 Iwa ge embe dji, na kerasin daram wan andret (100) ill we dji. Boiye ge embe dji, ni ami dje molo ola dje pepa al paipela ten (50) bole! dji. 7 Alla iwa ta wo moika boiye ge embe dji, ni wal in ge namba namba in ne? dji. Une ge embe dji, na plawa bek wan andret (100) ill we dji. Boiye ge ye molo, ni pepa al eit-pela ten (80) bole! dji.

8 Djika iwa kerman wo boiye singare ke yei mal wopake pille embe dji, ni wal pille kane yen mal ge ni wopake yen we dji. Jisas embe dji, makimb al mor una yenekne kogo yenj ge kanpol to yenj. Ba una au djinda al una mor ge embe nayenj. 9 Na kandja dje ye aundo, ye makimb al ku moni auneke, ye nane unakne merke moye. Ye embe yei dal, ku pora djinda kune, ye kam kupill al pineke God ye i numog wordaka, ye ege ege gun molo pa moye.

10 Una wal yepall ta yenda kantau wopake yei dal, alla wal merke moya ge, para kantau yenda kune yenda. Ba alla una wal yepall ta yenda kantau wopake nayei dal, ga para wal merke moya ge, kantau yene kune nayenda. 11 Ye makimb al wal moro kanpol natoi dal, una ne mal ta kupill wal wopake aundaka ye kantau yene? 12 Una djell ta wal ta yenda, ye kanpol natoi dal, una ne mal ye wal ine dje pille aunda ine ne? 13 Boi iwa ta moyaka numb ne soka mopill dal, kune nayenda; boiye ge ye molo ta ke kane, ta wopake kane embe yenda. Ta kandja djinda mal pille yenda, ta mop aunda paro. Ye God kogoye yene, alla ku kogoye ye aike yei dal, kune nayenda we dji. 14 Jisas kandja embe dje ga kambono awika, Parisi una ku pille we ye wani una ge pille po ye awi. 15 Aumaka Jisas kambono moi al embe dje awi, ye una mor ge, una nalene al wopake mopon dje yenj ba, ye nomane paknakill paro ge God kane kune yendo. Makimb una wal wopake kaima paro dje kaninj wal ge, God kando wal ke kaima paro.

16 Asa Jon nu pagle awi una namoi kune, God lo bolo pagi pai mal ne, propet kandja bolo pagi mal ge una pille we ye moi. Ba ipon Jon wo moi kune ge, kandja wopake God dumoye kantau yendo we dji al ge, una porapora kunda ye er pakna bon dje yenj. 17 Una embe yenj ba, God lo dje bolo pagi ge mon kembis kerman porapora aike er take dje napunda. Kupill makimb pora djinda ba, God loye ge kaima pa moya, pora nadjinda.

Iwana bolo inmell wo ke pundo mal

(Matyu 5.31-32 na 19.9 na Mak 10.11-12)

18 Iwa ta game kere po ana gun ta i dal, soka kunumb nambell. Alla ana ta woge kere po iwa gun ta punda ge, kunumb nambell we dji.

Lasaras ne, dje mogoi kane noi iwa soka yepill mal Jisas kandja buko dji.

19 Jisas embe dji, kune ge iwa ta ye molo dje mogoi merke kane no, konkunom wopake ye, kon bage momo woro, kwa mokna wopake ege ege eri no moi. 20 Une embe ye moika yene numbiye djillake yei al una iwo wormaka iwa ta moi; yene kandjiye ge Lasaras we dji. Une gakle al boll boll killngambo ye moi. 21 Iwa kerman ge kwa mokna no moika, tuge kale yage kal toi ge, Lasaras i nano dje pille moi. Ba yene gakle al killngambo ye moi ge, kena wo pen dje i noi.

22 Lasaras embe ye molo po goika, tau agelo wo une ipo kupill al wormaka, Abraam ge boll aike mopill. Mopillka are iwa kerman moi ge goika una ipo gull toi. 23 Iwa kerman ge une golo po una gor dumo ge molo gakle ngembill golo kane pla woro kani Abraam ne, Lasaras mopillka 24 une yau to embe dji, nena Abraam o! Na wamo al moro ge, wamo doll, gaklena al ge ngembill yendo. Ni na wandill golo aumben. Ni Lasaras djimbenka une po nu ta kolo i yene agle megye taimane ta to balo iwo na albena al megyaka na bi yenda piyo we dji. 25 Une kandja embe dji ba Abraam embe dji, warna, ni pille! Asa ni gun mon poke ni wal wopake kane non. Ba Lasaras wal ke ke kane noi. Ba ipon Lasarus wopake moraka, ni gaklen ngembill golo pa moren. 26 Alla kandja ta ge embe. God dul kerman to wori yei. No ye mor al wombon ge kune nayendo, alla ye no mormon al wone ge kune nayendo we dji.

27 Djika iwa kerman ge embe dji, nena, na kandja dje ni aundo. Ni dje worbenka Lasaras alla er yem na numbna al punda. 28 Po kandja djindaka, na agana 5-pela mor ge nomane ake to er na moro al wo djine, gaklene ngembill nagoye we dji. 29 Djika Abraam embe dji, Mosis ne, propet kambono pepa bolo pagi mal ge, ni agan kambono kere kani dal, ni dumo moren al wo namoye we dji. 30 Djika iwa kerman ge embe dji, nena Abram, ge man! Una ta golo aglo er yem pineke kambono ta kani dal, ga nomane ake tane we dji. 31 Une kandja embe dji ba, Abram embe dji, Mosis ne, propet kandja dji mal ge ni agan kambono ta kere kane pille nai dal, ge una ta golo aglo er yem po kandja djinda ge aike napiye we dji.